Здружението „Нефрон“' под мотото „Унапредување на пристапот до нега и оптимално лекување на бубрежно болните лица“, денеска го одбележи Светскиот ден на бубрегот.
Унијата на ЗМСТАС предводена од ЗМСТАС „ЗА НАС“ и овој пат го поддржа настанот на нашите долгогодишни соработници давајќи придонес кон унапредување на квалитетот на услугите и професионалноста на кадрите.
Светскиот ден на бубрегот се одбележува секој втори четврток од март во повеќе од 150 земји ширум светот. Кај нас се одбележува по 19-ти пат, под покровителство на Меѓународното здружение за нефрологија (ISN) и Меѓународната федерација на бубрежни фондации (IFKF).
На настанот се обратија претставници од институциите и одржаа стручни предавања со цел едукација на членството, но и подигнување на свеста за превенција на бубрежните болести, нивно рано откривање и изнаоѓање можности за навремен соодветен третман.
Според претседателот на „Нефрон“, Душко Ѓоргиев, и покрај постигнатото унапредување во пристапот и значајно подобрените услови за лекување со дијализа во земјава, како приоритет останува зголемувањето на превентивната заштита и достапноста на соодветни нови лекови за сите пациенти.
